8 ноября 2019
Хъæууон скъолатæн сæ фылдæр у раджы заманты арæзт, æмæ сæ цалцæг кæнын хъæуы. Нæ республикæйы Сæргълæууæг Битарты Вячеславы хъæппæрисæй Уæрæсейы Федерацийы Хицауад баххуыс кæндзæн уыдоны капиталон æгъдауæй цалдæр азмæ сцалцæг кæнын.
Нæ районы рагондæр ахуырадон уагдæттæй иуыл нымад у Весёлæйы астæуккаг скъола. Кæддæриддæр дзы ахуыр кодтой ирон æвзаг æмæ литературæ. Кабинетон системæмæ куы рахызтысты скъолатæ, уæд дзы фæзынд ирон æвзаджы кабинет дæр. Абон дзы кусы нæ район æмæ республикæйы фæлтæрдджындæр ахуыргæнджытæй иу Годжиаты Верæ. Весёлæйы скъола 26 октябры сбæрæг кодта йæ 95- азыккон юбилей. Ахуыргæнджытæ æмæ скъоладзаутæ уазджытæн сарæзтой экскурситæ. Æппæтдунеон æхсæнадон змæлд «Иры Стыр Ныхас»-ы Мæздæджы районы хайады сæрдар Гуцаты Фридон бабæрæг кодта ирон æвзаджы кабинет. Ирон æвзаджы ахуыргæнджытæ Годжиаты Верæ æмæ Джидзæлаты Зарифæ йын радзырдтой сæ куысты тыххæй. Амалхъом адæмы, ныййарджыты фæрцы кабинет цалцæггонд цæуы: Хохойты Игорь сын аивта сæ хæлддзаг рудзгуытæ æмæ дуар. Пъолыл линолеум байтауынæй дæр сын зæрдæ бавæрдта.
Гуцаты Ф. æхсæнады номæй ахуыргæнджытæн балæвар кодта, нырыккон домæнтæм гæсгæ сæ цы техникон ифтонггæрзтæ хъæуы, уыдонæй иу – принтер. Кабинеты нæй, чиныг кæм æрæвæрай, ахæм тæрхæджытæ, ивинаг сты цæстуынгæ æрмæджытæ дæр. Гуцаты Ф. бафиппайдта: Веселæйы, Винограднæйы, Черноярскæйы æмæ Ново-Осетинскæйы скъолатæ æнæхъæн районы сты бындурон ирон æвзаг æмæ литературæ ахуыр кæныны хъуыддаджы. Нæ ныфс сты ирон æвзаджы ахуыргæнджытæ, кæцытæ нырыккон ныййарджытæн хъуамæ æмбарын кæной, куыд æхсызгонæй хъæуы бинонты æхсæн иронау дзурын, ирон радиомæ хъусын, ирон телеуынынадмæ кæсын. Ныртæккæ республикæйы архайынц, цæмæй иронау уагъд цæуой мультипликацион кинонывтæ æмæ бирæ æндæр цæстуынгæ æрмæджытæ. Уыдонæй раст æмæ уæрæхæй хъуамæ пайда кæной æрмæст ахуыргæнджытæ нæ, фæлæ ныййарджытæ дæр æмæ сæ сабитæ дæр.
БÆЗЫТЫ Л.
(От районного подразделения МОД «Высший Совет осетин» Ф. Гуцаев в честь 95-летия Веселовской школы подарил ей для кабинета осетинского языка принтер. На снимке: Ф. Гуцаев с учителями осетинского языка В. Годжиевой (сидит) и З. Джидзаловой).
